જૂનું શેર-હાઉઝ ખાલી કરતાં

ઓસ્ટ્રેલિયા, નિબંધ, પર્થ

કવિ બાલમુકુન્દ દવેની કવિતા (જેનાં પરથી આ ટાઈટલ ઈન્સ્પાયર્ડ છે) જેવી કોઈ ફીલિંગ આવી નથી રહી અત્યારે તો! જો હું એ કવિતાનું મારું વર્ઝન લખું તો કવિતા દુઃખભરી છે કે ઉલ્લાસભરી એ જ ખબર ન પડે (મિક્સ્ડ ઈમોશન્સ). દોઢ અઠવાડિયા પહેલાં શરુ કરેલું પેકિંગ-પુરાણ લગભગ પૂરું થઇ ગયું છે. હવે ફક્ત જરૂરિયાતની પાંચ દિવસ પૂરતી થોડી જ વસ્તુઓ બહાર રાખી છે. શુક્રવાર – ૨૬મી જુલાઈએ નવા ઘરની ચાવી મળશે. અત્યારનું ઘર ટિપીકલ સ્ટૂડન્ટ-હાઉઝ છે. થોડું ઘણું સંયુક્ત પરિવારમાં રહેવા જેવું છે. હું આ ઘરમાં (કે આ પહેલાનાં કોઈ પણ ઘરમાં) રહેવા આવી એ પહેલાં મારાં ૪ હાઉઝ-મેટ્સ કોણ હશે, કેવા હશે તેની મને ભનક પણ નહોતી. પણ, એ વાત પાક્કી હતી કે એ જે કોઈ હોય તેમની સાથે પડ્યું પાનું નિભાવવાનું હતું. વળી,  સંયુક્ત પરિવારમાંમાં ચાલતાં જીવન-મૃત્યુનાં અગમ-અનિશ્ચિત ચક્રની જેમ શેર હાઉઝમાં પણ સમયાંતરે જૂના લોકો જાય અને નવા લોકો આવતા રહે છે. દરેકની પસંદ-નાપસંદ, સ્વભાવ, પ્રકૃતિ સાથે અનુકૂળ થઈને રહેવાનું હોય અને ખરેખર પરિવાર નથી એટલે એકબીજાને કંઈ પણ કહી શકવાની લક્ઝરી ન મળે. જો એવી આઝાદી જોઈતી હોય તો તેનાં પ્રત્યાઘાત અને પરિણામો વિશે પૂરો વિચાર અને તૈયારી રાખવી પડે. ઇમોશનલ ઈન્ટેલીજન્સનાં પ્રાથમિક પાઠ શીખાવની શરૂઆત અહીંથી જ થઇ જાય.  અહીં આવ્યા પછીનાં ચાર વર્ષમાં હું હંમેશા શેર-હાઉઝમાં જ રહી છું એટલે એક શેર હાઉઝમાંથી બીજામાં જતી વખતે ફક્ત નવા સાથીઓ અને નવી જગ્યા પૂરતી નવીનતા લાગતી. પણ, હવેનાં ઘરમાં ફુલ-ટાઈમ જોબ અને નિશ્ચિત સ્થાયી આવકવાળી હું એકલી રહેવા જઈ રહી છું અને ત્યાં પાંચ દિવસમાં મૂવ થઉં છું એટલે આ વખતે ઘર ફેરવવાની સાથે એક નવા અધ્યાયની શરૂઆત થશે.

હાલ મારી પાસે ફર્નીચરમાં કંઈ નથી અને નવું ઘર ફુલ્લી ફર્નિશ્ડ છે એટલે એ એક મોટામાં મોટી શાંતિ છે. વર્ક ઉપરથી જેમાં મોનિટર આવ્યા હોય તેવાં મોટાં ૪ બોક્સ હું લાવી છું અને તેમાં ઘણું બધું ભરવામાં આવ્યું છે. મસાલા, અનાજ, કઠોળ વગેરેનાં ખુલ્લા પેક વ્યવસ્થિત ફોલ્ડ કરીને તેનાં પર ક્યાંયથી કંઈ ઢોળાય નહીં તેમ સેલોટેપ મારીને તેને પેક કર્યા છે. આ દોઢ વર્ષમાં મારી લાવેલી ૬ ચમચીઓ કોઈને ને કોઈએ કોઈ પણ રીતે ફેંકી દીધી છે અને બે કાચનાં ગ્લાસ હતાં જે ફૂટી ગયા છે.પ્લેટ તો હજુ સુધી એક પણ ઘરમાં લેવાની જરૂર પડી જ નથી (કારણ કે, લેન્ડ લોર્ડનું વસાવેલું અથવા ઘરમાં બધાં વચ્ચે લીધેલું છે) કાચનું એક બૌલ અને એક દોસ્તે ગિફ્ટ કરેલો મગ છે ફક્ત એટલે કટલરી બધી નવી લેવાની છે. રસોઈ બનાવવાનો મારો સામાન – છરી, ચમચા વગેરે વીણવા પડ્યા હતાં કારણ કે, લેન્ડ-લોર્ડનું, મારું અને અન્ય હાઉઝ-મેટ્સનું બધું રહેતું તો એક ખાનામાં એક સાથે જ હોય અને ઘરની દરેક વસ્તુ ઘરમાં હોય ત્યાં સુધી તો બધાં ઘરની જેમ વાપરતા જ હોય. તેમાં મારી પાસે ઘણું ખૂટે છે અને અમુક મારું છે કે નહીં તે ખબર નથી એટલે એ બધું નવું લેવાનું છે. ભાતનું કૂકર, કેસરોલ, પાટલો-વેલણ વગેરે તો જો કે મારાં સિવાય કોઈનાં હોય જ નહીં (આ ઘરમાં હું એક જ ભારતીય છું). અને તેલ, મસાલા વગેરેનું તો અમારું દરેકનું અલગ ખાનું છે એટલે તે સમેટવામાં કોઈ તકલીફ ન પડે. બાકી બાથરૂમમાંથી પણ મારો બધો મેક-અપ અને પિન જેવી ઝીણી-મોટી વસ્તુઓ વીણવી પડી હતી કારણ કે, ત્યાં પણ બધાનું બધું એક સાથે જ રહેતું હોય. વળી, બેક-યાર્ડ અને શેડમાં તો પોતાની વસ્તુઓ જુઓ ત્યારે યાદ આવે કે, મારી પાસે આ પણ છે! માળિયાની જેમ અહીં બધું વર્ષોથી પડ્યું છે અને અડાયું નથી. બહારથી મારું ડ્રિન્ક્સ ઠંડા રાખવા માટેનું એસ્કી અને બે નાની ખુરશીઓ પહેલેથી જ સમેટીને બેગ્સ ને બોક્સિસ સાથે રાખી દીધાં છે. રખે ને છેલ્લે ઉતાવળમાં ભૂલાઈ જાય તો! જો કે, મોટાં ભાગની વસ્તુ આમ પણ નવી જ લેવાની છે એટલે એ વિશે મને એક સંતોષ એ વાતનો છે કે, હવે હું સારી ક્વોલિટીની વસ્તુ વસાવી-વાપરી શકીશ અને બે અઠવાડિયામાં એ કોઈ બગાડી નહીં નાખે.

દારૂનાં સ્ટોકમાં હમણાં તો કંઈ જોયું જ નથી એટલે મારું શું છે અને કેટલું છે એ યાદ જ નહોતું. ફ્રિજમાં કદાચ મારી વાઈનની એક આખી બોટલ હતી પણ આજે જોયું ત્યારે તેમાં બધી અડધી બોટલ જ હતી એટલે ખબર નહીં હવે એ બધી તો બધાંની બીજાની હશે. સ્પિરિટ્સનું  મારું પોતાનું બોક્સ જ હતું એટલે તેમાં હોય એ બધાં મારાં જ હોય એ સમેટી લેવામાં આવ્યા છે.  સ્પિરિટ્સમાં મારી છેલ્લી ફેબ્રુઆરીની પાર્ટીમાંથી શું અને કેટલું બાકી રહ્યું હતું એ યાદ નહોતું એટલે પેક કરવાની સાથે સાથે એ મગજમાં પણ રેકોર્ડ કરી લીધું છે. નવા ઘરમાં હાઉઝ-વોર્મિંગ પાર્ટી કરવાની આવશે જ ત્યારે નવું શું લેવાનું છે એ નક્કી કરવામાં મદદરૂપ થશે. એક ૩/૪ સાઈઝનું અકૂઝ્ટીક ગીટાર હતું જે મોટાં ઉપાડે શીખવા માટે ૨ વર્ષ પહેલાં લીધું હતું. પણ એ લીધાનાં છ મહિના પછી ભણવા વગેરેમાં એ કાર્યક્રમ  અટવાઈ પડ્યો હતો ને હવે ફરીથી ડાન્સનાં કારણે શરુ થવાનો પણ નહોતો તેની મને ખાતરી હતી એટલે સમજીને એ મેં વેચવા મૂકી દીધું હતું. ગઈ કાલે એક બહેન આવીને એ લઇ ગયાં એટલે એટલું તો નાજુક ફેરવવું મટ્યું! હવે નાજુક સામાનમાં ચિંતા મને ફક્ત મારાં પુસ્તકો, ડ્રોઈંગ બુક્સ, છૂટાં ડ્રોઈંગ-સ્કેચિઝનાં કાગળિયા, કેન્વસ અને ઈઝલની છે કારણ કે, એ દિવસનો વેધર ફોરકાસ્ટ વરસાદી અને વીજળીઓનો છે! જોઈએ હવે ત્યારે જે થાય તે ખરું. કૃષ્ણ-વસુદેવની જેમ પુસ્તાકો અને હુંયે નસીબદાર હોય તેવી આશા રાખીએ. આમ, બાલમુકુન્દ અંકલની જેમ જ મનેય ‘હાથ લાગ્યું ઘણું’. પણ, તેમનાં જેટલું ડીટેઇલમાં નહીં કારણ કે, ન તો આ મારું પોતાનું ઘર છે કે ન તો પોતાનાં ઘરમાં હોય તેટલો સામાન!

નવાં ઘરની વાત કરું તો, હું સીબીડી (સેન્ટ્રલ બિઝનેસ ડિસ્ટ્રિકટ)થી આટલી નજીક પહેલાં ક્યારેય રહી નથી અને ઘર સીબીડીથી પ્રમાણમાં ઘણું નજીક છે. વળી, તેની આસપાસ કરવાનું ઘણું બધું છે અને બધું એકદમ નજીક-નજીક છે. અત્યાર સુધી શહેરથી દૂરનાં સબર્બમાં રહી છું એટલે લગભગ હાઈવેની આજુબાજુ રહેતી વ્યક્તિ બરાબર ગામની વચ્ચે રહેવા જઈ રહી હોય તેવું કંઇક લાગે છે. અત્યાર સુધી હું એવા જ વિસ્તારોમાં રહી છું જ્યાં રાત્રે સાડા આઠ પછી શેરીઓમાં અને મુખ્ય રસ્તા પર સોપો પડી જાય. પણ, નવા ઘરની આસપાસનાં વિસ્તારમાં લોકોની સતત અવરજવર રહેશે. સૌથી પહેલી વસ્તુ મારે મારી કારનો ઇન્શ્યોરન્સ લેવાની કરવાની છે કારણ કે, ગામમાં રહેતાં હોઈએ ત્યારે કયો દારૂડિયો/ચરસી કારનાં કાચ ફોડી જાય એ કંઈ નક્કી ન કહેવાય! અત્યાર સુધી જો ઘરની ચાવી લેવાની ભૂલી જવાય તો અન્ય હાઉઝ-મેટ દરવાજો ખોલી શકે અને બધાં બહાર હોય તો કોઈ એક ઘરે આવે તેની રાહ જોઈ શકાય. પણ, હવેથી એ લક્ઝરી નહીં રહે. તે માટેની વ્યવસ્થા તરીકે અમુક ખાસ મિત્રોનાં ઘેર એક ચાવીઓનો સેટ હંમેશા રાખવાની યોજના છે અને નજીકમાં નજીકનાં ૨૪ x ૭ પુલીસ સ્ટેશનનાં નંબર ફોનમાં સેવ કરી લેવાની પણ.

નવા ઘરમાં શિફ્ટ થવા વિશે હું કેવું અનુભવું છું એ તો મને ખબર જ નથી. થોડાં મહિના તો જાણે ઘર માટે ઝીણી-મોટી વસ્તુઓ લેવાનાં, ઘરને સજાવવાનાં અને નવા વાતાવરણનાં એક્સાઈટ્મેન્ટમાં જ જશે. પણ, એક વખત ટેવાઈ ગયા પછી રોજબરોજનાં સામાન્ય રૂટિન માહોલમાં મને ત્યાં એકલા રહેવું કેવું અને કેટલું ગમશે તે તો હવે ખરેખર થશે ત્યારે જ ખબર પડશે. મિત્રોનું કહેવું એમ  છે કે, મોટાં ભાગે છોકરીઓને એકલા રહેવું ગમતું હોય છે. પણ, છોકરાઓ એકલા રહે તો સામાન્ય રીતે પાગલ થઇ જાય અને શું કરવું ને શું નહીં એ જ સમજી ન શકે એવું બનતું હોય છે. અમુક કહે છે કે, મને બહુ ગમશે અને અમુક કહે છે કે, હું બહુ કંટાળીશ. અને બંને તરફનાં લોકો ખરેખર તો મારાં પોતાનાં વિચારો અને આંતરિક કોન્ફ્લીક્ટનો જ પડઘો પાડી રહ્યાં છે. વળી, નવા ઘરમાં હું વાયરલેસ કનેક્શન નથી લેવાની. ફોનમાં જે ૩ ગિગનું અલાવન્સ મળે છે તે ઘર માટે તો પૂરતું છે અને બાકી કામ પર તો દિવસનાં ૮ કલાક ઈન્ટરનેટ કનેક્શન છે જ. એટલે અત્યારે તો એમ લાગે છે કે, આમ જ રાખવું હિતાવહ છે. તેનાંથી ખર્ચ ઘટશે અને પ્રોડક્ટીવિટી વધશે. અને મૂવિઝ, ટીવી શો જે કંઈ જોવા હોય તે મિત્રો પાસેથી ક્યાં નથી લેવાતાં!  તે વિશેનો અંતિમ નિર્ણય જો કે, એક-બે મહિનાનો પ્રયોગ કર્યા પછી કેવી જરૂરિયાત લાગે છે તેનાં પરથી લેવામાં આવશે. ઘરનું ભાડું હું હાલ ભરું છું તેનાં કરતાં અઢી ગણું વધી જવાનું છે અને સેવિંગ તો હતું તેટલું જ રાખવું પડે તેમ છે. એટલે, પાર્ટી લાઈફ-સ્ટાઈલનો અંત બહુ નજીક લાગી રહ્યો છે. આમ પણ હવે મને બહાર જવાનો કંટાળો આવવા માંડ્યો હતો એટલે સોશીયાલાઈઝીંગ બંધ કરવાનું નક્કી તો કર્યું જ હતું પણ હવે તો સરસ કારણ પણ મળી ગયું છે. કોઈ પૂછે તો કહી દેવાનું કે, પૈસા નથી એટલે આપણે તો ઠંડે પાણીએ ખસ ગઈ. એકલી એકલી કરીશ શું? વધુ વાંચવાનું, વધુ દોરવાનું, વધુ લખવાનું, રોજ જમવાનું બનાવવાનું અને ઘર સાચવવાનું, ઈચ્છા પડે તેવું મ્યુઝિક વગાડવાનું, ક્યારેક ટીવી જોવાનું અને એક-બે એક-બે અઠવાડિયે અમુક-તમુક મિત્રોને મારાં ઘેર રોકાવાનું આમંત્રણ આપવાનું. હાલ તો એવા સપના છે. જો કે, આ બધાં મિક્સ્ડ ઈમોશન્સ ઉપરાંત મને એક હાશકારાની  લાગણી તો ચોક્કસ છે. અંતે હવે મારાં પોતાનાં ઘરમાં મને થોડી શ્વાસ લેવાની જગ્યા મળશે.

11 thoughts on “જૂનું શેર-હાઉઝ ખાલી કરતાં

  1. તમે આપ્યો છે. :) નવું ઘર શુક્રવારથી મુબારક થશે. It’s always encouraging to know that people out there appreciate what I am passionate about. :)

  2. “Inspiration is for amateurs, the rest of us just get to work” ;) Besides, it’s always encouraging to know people out there wait for the posts and I am not writing complete gibberish. :) Thanks for taking the time out for the feedback.

    P.S. I do have a copy of The Holstee Manifesto on my work desk and embedded in my actions (mostly :D) .. “Do what you love, and do it often”

  3. Its great to see that writing in Gujarati falls into the realm of ‘doing what I feel like doing without worrying about other things’. Its not compulsive writing, its not writing for the sake of it (many do!) and you don’t need an outside inspiration to write in your language. These are all the positives I take from this conversation! Great! :)

  4. હું પણ તમારો બ્લોગ ઘણાં વખતથી વાંચી રહી છું. આ અગાઉ કોઈ પોસ્ટ પર મેં પ્રતિભાવ આપ્યો છે કે નહીં એ યાદ નથી. કાર્તિક મિસ્ત્રીએ તમારા બ્લોગનો ઉલ્લેખ કર્યો હતો ત્યારથી આ બ્લોગને ફોલો કરું છું. મને તમારી ઘણી પોસ્ટ ગમી છે. હાલ તો તમને નવું ઘર મુબારક.

  5. ગુજરાતી/ ઇંગ્લિશ વચ્ચેની પસંદગીનો તો પ્રશ્ન જ નહોતો ક્યારેય. મને વધુ મજા ગુજરાતીમાં લખવાની આવે છે અને ગુજરાતીમાં લખવાનો મહાવરો છૂટી જાય તો બહુ દુઃખ થાય એટલે લખું છું. I am not making (and never going to make) a career out of writing anyway so it’s rather easy to just do whatever I really feel like doing without having to worry about the other aspects of it. :) Cheers for the appreciation! :D

  6. ઉપરોક્ત શબ્દો મારાં નથી. મારાં મિત્રનાં છે ;) And welcome me to the league :D

  7. હું તમારો બ્લોગ થોડાક સમયથી વાંચી રહ્યો છું. પોતાનું ઘર બદલવા જેવી બીજાને બોરિંગ લાગે તેવા વિષય પર તમે રસપ્રદ શૈલીમાં લખી શકો છો. સાથે સાથે તમારા બ્લોગ પરથી પરદેશમાં રહેતી સ્વતંત્ર, પ્રગતિશીલ યુવા પેઢીના ‘પ્રતિનિધિ’ હોવાની છાપ ઉપસે છે અને યથાવત રહે છે. કદાચ તમે અંગ્રેજીમાં બ્લોગ લખી શક્યા હોવા છતાં મહત્વની વાત એ છે કે તમે આ બધું ગુજરાતીમાં લખો છો. અને એના લીધે એકદમ સમકાલીન અભિવ્યક્તિ અમને ગુજરાતીમાં મળે છે, તેની મજા છે. Keep it up and happy shifting to the new place! :)

  8. ટાગોર દાદાએ ભલે કહ્યું કે તમે ” એકલા ચાલો રે ” ( અહીંયા રહો રે ! ) . . . પણ , આખરે અમે છોકરાઓ એકલા નથી રહી શકતા ( એકલા હોઈએ અને , એમાય જો ઇન્ટરનેટ અને ઈલેક્ટ્રીસીટી ના હોય તો તો . . . )

    Welcome to ‘ justice League ‘ or say ‘ League of extraordinary Gentleman ‘ :)

  9. ” છોકરાઓ એકલા રહે તો સામાન્ય રીતે પાગલ થઇ જાય અને શું કરવું ને શું નહીં એ જ સમજી ન શકે. ” – જોકે , મારા કેસમાં હું થોડે મોડેકથી પાગલ થાવ છું ;)

    A’lone’ Ranger :)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s